ನನ್ನ ಮನೆಯ ಡೈನಿಂಗ್ ಟೇಬಲ್

– ಸುಮುಕ  ಬಾರದ್ವಾಜ್. 

ನನ್ನ ಮನೆಯಲ್ಲಿ ಒಂದು
ಡೈನಿಂಗ್ ಟೇಬಲ್ ಇದೆ
ಅಲ್ಲಿ ಯಾರೂ ಕೂತು
ಊಟ ಮಾಡುವುದಿಲ್ಲ

ಇಂದು ಕೂತು ಊಟ ಮಾಡಬಹುದು
ನಾಳೆ ಕೂತು ಊಟ ಮಾಡಬಹುದು ಎಂದು
ಅಲುಗದೆ ಕಾದುಕುಳಿತಿರುತ್ತದೆ
ಅಮೆರಿಕಾದಲ್ಲಿ ನೆಲೆಸಿರುವ ತನ್ನ ಮಕ್ಕಳು
ಇಂದು ಬಂದಾರು ನಾಳೆ ಬಂದಾರು ಎಂದು
ತಾಯಿ ಕಾದು ಕೂರುವಂತೆ

ಕೂರದಿದ್ದರೂ ಇದಕ್ಕೆ
ಹಣ್ಣಿನ ಬುಟ್ಟಿ ,
ಚೇರುಗಳ ಸಾಂಗತ್ಯ,
ವಾಟರ್ ಜಗ್ಗಿನ ತಂಪು,
ದೂಳಿನ ಬೆಚ್ಚನೆ ಹೊದಿಕೆ
ಇವೆಲ್ಲ ಸಮಾದಾನಕರ ಪ್ರಶಸ್ತಿಯಂತೆ ಇವೆ

ಹುಟ್ಟುಹಬ್ಬಕ್ಕೋ, ದೀಪಾವಳಿಗೂ
ಪೋನು ಮಾಡುವ ಆ ನೆಂಟನಂತೆ
ಇದಕ್ಕೂ ಒಳ್ಳೆ ದಿನ ಇದೆ!
ಅದು ಮನೆಗೆ
ಅಪರೂಪದ ಗೆಳೆಯನೋ, ನೆಂಟರೋ ಬಂದಾಗ
ಅವರನ್ನು ಕೂರಿಸಿ
ಊಟ ಬಡಿಸುವುದಕ್ಕೆ

(ಚಿತ್ರ ಸೆಲೆ: shedhouseplans.com )