ಕವಿತೆ: ನಗೆ ಹೊನಲು

– ಶ್ಯಾಮಲಶ್ರೀ.ಕೆ.ಎಸ್.

ನಗುವಿಗೊಂದು ಸಲಾಮು
ಮನದ ಹುಣ್ಣಿಗೆ ನಗುವೇ ಮುಲಾಮು
ಮನೋಲ್ಲಾಸವು ನಗುವಿತ್ತ ಇನಾಮು

ಚೆಂದದ ಮೊಗಕೆ ನಗುವೇ ಆಬರಣ
ಮಗುವಿನ ನಿಶ್ಕಲ್ಮಶ ನಗುವದು ಸಿಹಿ ಹೂರಣ
ಸ್ವಸ್ತ ಜೀವನಕೆ ಸಂತಸದ ನಗುವೇ ಕಾರಣ

ನಗುವಲ್ಲಿದೆ ನಾನಾ ಪರಿಯು
ನಗುವಿನೊರತೆಯೇ ಬದುಕಿಗೆ ಸಿರಿಯು
ನಗುವಿಂದಲೇ ನೋವಿಗೆ ಕೊನೆಯು

ಹರಿಯುತಿರೆ ನಗೆ ಹೊನಲು
ಕಣ್ಮರೆಯಾಗುವುದು ಅಂತರಂಗದ ಅಳಲು
ದೂರಸರಿಯುವುದು ದಿಗಿಲು

ನೊಂದ ಮನಸ್ಸಿಗೆ ನಗೆಯೇ ಗುಳಿಗೆ
ನಗೆಯಿಲ್ಲದೆ ಸಾರವಿಲ್ಲ ಬದುಕಿಗೆ
ನಗುತ ನಗಿಸುತ ಸಾಗುವ ಬಾಳಪಯಣದೆಡೆಗೆ

(ಚಿತ್ರ ಸೆಲೆ: kalw.org)