ಮಾಡಿ ನೋಡಿ ಬೇಳೆ ಹೋಳಿಗೆ ( ಒಬ್ಬಟ್ಟು )

– ನಿತಿನ್ ಗೌಡ. 

ಏನೇನು ಬೇಕು ?

• ಕಡಲೇಬೇಳೆ – 1 ಕಪ್ಪು
• ಬೆಲ್ಲ – 1 ಕಪ್ಪು
• ಉಪ್ಪು – 1/4 ಚಮಚ
• ಅರಿಶಿಣ – 1/4 ಚಮಚ
• ಮೈದಾ ಹಿಟ್ಟು – 2 ಕಪ್ಪು
• ತುಪ್ಪ – 2 ಚಮಚ
• ಎಣ್ಣೆ – 4 ಚಮಚ

ಮಾಡುವ ಬಗೆ:

ಮೊದಲಿಗೆ ಬೇಳೆಯನ್ನು ತೊಳೆದು ಒಂದು ಗಂಟೆ ನೆನೆಯಲು ಇಡಿ. ಈಗ ಒಂದು ಪಾತ್ರೆಗೆ ಮೈದಾ, ಕಾಲು ಚಮಚ ಉಪ್ಪು, ಕಾಲು ಚಮಚ ಅರಿಶಿಣ, ಸ್ವಲ್ಪ ನೀರು ಹಾಕಿ , ಚೆನ್ನಾಗಿ ನಾದಿರಿ( ನುಣ್ಣಗೆ ಕಲಸಿ ). ಈಗ ಇದಕ್ಕೆ ಸ್ವಲ್ಪ ತುಪ್ಪ ಹಾಕಿ ಕಲಸಿಕೊಳ್ಳಿ. ನಂತರ ನಾಲ್ಕು ಚಮಚ ಹಾಕಿ ,ಕಲಸಿ ಒಂದೆರಡು ಗಂಟೆ ಹಾಗೆಯೇ ಹಿಟ್ಟನ್ನು ಮುಚ್ಚಿಡಿ. ಒಂದು ಗಂಟೆಯ ನಂತರ ಬೇಳೆಯನ್ನು ಕುಕ್ಕರ್ ಗೆ ಹಾಕಿ ಮೂರು ಸೀಟಿ ಹೊಡೆಸಿ ತೆಗೆಯಿರಿ. ಈಗ ಇದಕ್ಕೆ ಬೆಲ್ಲ ಹಾಕಿ, ಬೆಲ್ಲ ಸ್ವಲ್ಪ ಕರಗುವವರೆಗೆ ಬೇಯಿಸಿಕೊಳ್ಳಿರಿ. ಇದಕ್ಕೆ ಅರಿಶಿಣ ಪುಡಿ ಮತ್ತು ಚೂರು ಉಪ್ಪು ಸೇರಿಸಿಕೊಳ್ಳಿರಿ. ಈಗ ಇದನ್ನು ನುಣ್ಣಗೆ ರುಬ್ಬಿಕೊಳ್ಳಿರಿ. ಒರಳಿನಲ್ಲಿ ರುಬ್ಬಿದರೆ ಚೆನ್ನಾಗಿರುತ್ತದೆ. ಈಗ ಮೈದಾ ಹಿಟ್ಟಿನಿಂದ ಉಂಡೆ ಮಾಡಿ, ಅದನ್ನು ಕೊಂಚ ಅಗಲ ಒತ್ತಿಕೊಂಡು, ಅದರೊಳಗೆ ರುಬ್ಬಿಕೊಂಡ ಹೂರಣ ಹಾಕಿ, ಒಂದು ಪ್ಲಾಸ್ಟಿಕ್ ಹಾಳೆಯ ಮೇಲೆ ಕೊಂಚ ಎಣ್ಣೆ ಸವರಿ ದುಂಡಗೆ ತಟ್ಟಿಕೊಳ್ಳಿರಿ. ಈಗ ಇದನ್ನು ಹೆಂಚಿನ ಮೇಲೆ ತುಪ್ಪ ಇಲ್ಲವೇ ಎಣ್ಣೆ ಸವರಿ ಬೇಯಿಸಿ. ಈಗ ಬಿಸಿ ಬಿಸಿ ಬೇಳೆ ಹೋಳಿಗೆ ತಯಾರಿದ್ದು ಇದನ್ನು ತುಪ್ಪ, ಇಲ್ಲವೇ ಹಾಲಿನ ಜೊತೆ ತಿನ್ನಲು ಚೆನ್ನಾಗಿರುತ್ತದೆ.

ಹಲವು ಬಗೆಯ ಹೋಳಿಗೆಗಳಿದ್ದು, ಹೂರಣ ಯಾವುದರಲ್ಲಿ ಮಾಡಿದ್ದಾರೆ ಎನ್ನುವುದರ ಮೇಲೆ ಹೋಳಿಗೆ ಬಗೆ ಬದಲಾಗುತ್ತದೆ. ಕಾಯಿ ತುರಿ, ತೊಗರಿಬೇಳೆ, ಒಣ ಹಣ್ಣುಗಳ ಮಿಶ್ರಣ, ಕ್ಯಾರೇಟ್ ಮತ್ತು ಅನಾನಸ್ ಹೀಗೆ ಹಲವು ಬಗೆಯ ಹೂರಣಗಳನ್ನು ಬಳಸಿ ಕೂಡ ಹಲವು ಹೋಳಿಗೆ ಮಾಡಬಹುದು.

( ಚಿತ್ರಸೆಲೆ: ಬರಹಗಾರರು )