ಕವಿತೆ: ನಿದಿರೆ ಓ ನಿದಿರೆ

– ಶ್ಯಾಮಲಶ್ರೀ.ಕೆ.ಎಸ್.

ನಿದಿರೆ ಓ ನಿದಿರೆ
ಸದ್ದಿಲ್ಲದ ಇರುಳಲಿ ಕದ್ದು ಬರುವೆಯಾ
ಕಣ್ಣ ರೆಪ್ಪೆಯಲಿ ಜೋಕಾಲಿ ಆಡುವೆಯಾ
ಕಾರಿರುಳ ಚಿಂತೆ ಮರೆತು ಜಾರುವೆಯಾ

ನಿದಿರೆ ಓ ನಿದಿರೆ
ಕಲ್ಪನೆಯ ಗೂಡಲ್ಲಿ ಬಂದಿಯಾಗಿ
ಕನಸುಗಳ ಮೆಲುಕು ಹಾಕುವೆಯಾ
ಚಂದಿರನ ಚೆಲುವ ಚುಂಬಿಸಿ
ತಂಗಾಳಿಯ ಸೋಕಿಗೆ ಮೈಮರೆವೆಯಾ

ನಿದಿರೆ ಓ ನಿದಿರೆ
ಬೆಳದಿಂಗಳ ಬೆಳಕಿನ ರಂಗೋಲಿಯಲಿ
ರಾತ್ರಿ ಪೂರ ಕಂಗಳ ತಣಿಸುವೆಯಾ
ದಣಿವನು ದೂರ ಇಡುವೆಯಾ

ನಿದಿರೆ ಓ ನಿದಿರೆ
ನೀನಿಲ್ಲದೆ ಚಡಪಡಿಸಿದ್ದು ಅದೆಶ್ಟೋ
ಬೇಡದ ಚಿಂತೆ ಕಾಡಿ ಮರುಗಿದೆಶ್ಟೋ

ನಿದಿರೆ ಓ ನಿದಿರೆ
ಸನಿಹದಿ ಇದ್ದು ಕಣ್ಣೀರ ಒರೆಸುವೆಯಾ
ಮನಸಿನ ಬಾರವ ಹಗುರಾಗಿಸಿ
ನೋವುಗಳ ನಂದಿಸುವೆಯಾ

ನಿದಿರೆ ಓ ನಿದಿರೆ
ಕದ್ದೊಯ್ದ ರಾತ್ರಿಗಳ ಮರಳಿಸಿ
ನಯನಗಳ ಆವರಿಸುವೆಯಾ
ಸಿಹಿ ನೆನಪುಗಳ ತರುವೆಯಾ
ಉತ್ಸಾಹದ ಚಿಲುಮೆ ನೀನಾಗುವೆಯಾ.

(ಚಿತ್ರಸೆಲೆ: pixabay.com )