ಮತ್ತೆ ಆಸೆಯೊಂದು ಚಿಗುರಿದೆ

– ನಾಗರಾಜ್ ಬದ್ರಾ.

ಮತ್ತೆ ಆಸೆಯೊಂದು ಚಿಗುರಿದೆ
ಮತ್ತೊಮ್ಮೆ ಮುಂಜಾವಿನ ಆಗಮನವಾಗಿದೆ
ಹ್ರುದಯದಲ್ಲಿ ನೀ ಬರುವ ಸಂಚಲನವಾಗಿದೆ

ಕತ್ತಲೊಂದಿಗೆ ಕೊನೆಯಾದ ದಿನವು
ಹೊಸಬೆಳಕಿನೊಂದಿಗೆ ಶುರುವಾಗಿದೆ

ಕಾರ‍್ಮೋಡವು ಆವರಿಸಿರುವ ಮನದಲ್ಲಿಂದು
ನೀಲಿ ಆಗಸ ಕಾಣುವ ನಂಬಿಕೆಯೊಂದು ಹುಟ್ಟಿದೆ

ನನ್ನ ಎದೆಯ ಹೂದೋಟದ ಕೆಂಪು ಗುಲಾಬಿಯು
ನಿನ್ನ ಜಡೆಯ ಸೇರಲು ಮತ್ತೆ ಅರಳಿದೆ

ಗಂಟೆಗೊಮ್ಮೆ ಬರುತ್ತಿದ್ದ ನಿನ್ನ ಕರೆಯು
ಇಂದು ಮತ್ತೆ ಸದ್ದಿಲ್ಲದೆ ಬರುವುದೆಂದು
ಮನಸ್ಸು ಕಾಯುತ್ತಿದೆ

ಕಣ್ಣೀರಿನ ಮಳೆಯಲ್ಲಿ ನೆನೆದ ಜೀವವು
ಬಿಸಿಲಿನ ಪಲ್ಲಕ್ಕಿಯಲ್ಲಿ ತನ್ನ ರಾಣಿಯು
ಬರುವಳೆಂದು ಕನಸು ಕಾಣುತ್ತಿದೆ

ನೀನಿಲ್ಲದೆ ಮುನಿದು ಗೂಡು ಸೇರಿದ
ಮುಸ್ಸಂಜೆಯ ತಂಪಾದ ಗಾಳಿಯು
ಇಂದು ಮತ್ತೆ ಬೀಸುವ ಮೂನ್ಸೂಚನೆ ನೀಡಿದೆ

ಪ್ರೀತಿಯ ಆ ದಿನಗಳು
ನೀ ಮರಳಿ ತರುವೆ ಎಂದು
ಮತ್ತೆ ಆಸೆಯೊಂದು ಚಿಗುರಿದೆ ಗೆಳತಿ

(ಚಿತ್ರ ಸೆಲೆ: wallarthd.com )