ನಿನ್ನ ನಾನರಿಯಲು

– ವಿನು ರವಿ.

ಅಗಾದ ಜಲರಾಶಿ
ಕಣ್ಣಿಗೆ ನಿಲುಕದು
ಅಳೆಯಲು ಬಾರದು

ಮೇಲೆದ್ದ ಅಲೆಗಳ ಒಳಗೆ
ನೀಲಾಗಸವನ್ನೆಲ್ಲಾ
ಆವರಿಸುವ ತವಕ

ಹುಣ್ಣಿಮೆ ಚಂದಿರನ
ಚೆಲುವನ್ನೆಲ್ಲಾ
ಕದಿಯುವ ಪುಳಕ

ಅಲೆ ಅಲೆಯೊಳಗೊಳಗೆ
ಸರಿಸರಿದಂತೆಲ್ಲಾ
ಆಳಕಾಳಕೆ ಇಳಿದಂತೆಲ್ಲಾ

ಮುದ್ದಾಗಿ ಅವಿತು
ಕುಳಿತ ಮುತ್ತುಗಳ ರಾಶಿ
ಚಿತ್ರ ವಿಚಿತ್ರ
ಬಣ್ಣ ಬಣ್ಣದಾ ಜೀವರಾಶಿ

ಆಟ ನೋಟಗಳ
ಗೆಲುವು ಸೋಲಿನ
ನಿರಂತರ ಚೆಲ್ಲಾಟ

ಅಳತೆಗೆ ಸಿಗದ
ಅರ‍್ತಕ್ಕೆ ನಿಲುಕದ
ಸಾವಿರ ಸಾವಿರ
ಚೆಲುವಿನ ಬೆರಗಿನ ನೋಟ

ಹನಿ ಹನಿ ಬಿಂದುವಿನೊಳಗಿನ
ಒಲವಿನ ಬೆಸುಗೆಯ
ಬೆಸೆದ ಯಾವುದೋ
ಅರಿಯದ ಸಂಬಂದವ
ಬೆಸೆದವನ ಮರ‍್ಮವ
ಅರಿಯದೇ ಹುಡುಕುಡುಕುತಲೇ
ಸರಿದು ಹೋದವೇ
ರುತುರುತುಮಾನಗಳು?

ಹೇಳು
ನಿನ್ನ ನಾನರಿಯಲು
ನಿನ್ನ ಚೆಲುವಿನಾ
ಕಲೆಯ ಬಲೆಯ ಅರಿಯಲು

ನಾ ನನ್ನೊಳಗಿನಾಳದಲ್ಲಿ
ಅದೆಶ್ಟು ಬಾರಿ
ಇಳಿಯಬೇಕು

ನೀ ಸಿಗಲು
ಕಡಲ ಒಲವಿನಾ
ಅಲೆ ಅಲೆಯೊಳಗೆ
ಅದೆಶ್ಟು ಬಾರಿ ಮುಳುಗಬೇಕು

(ಚಿತ್ರ ಸೆಲೆ: freegreatpicture.com)