ಮಹಾಬಾರತ: ಕತನ ಕವನ
ವ್ಯಾಸಮುನಿಯು ರಚಿಸಿದಂತಹ
ಮಹಾಕಾವ್ಯವು ಬಾರತ
ಜನಪದರೆಲ್ಲರ ನಾಲಿಗೆ ಮೇಲೆ
ನಲಿಯುತಲಿರುವುದು ಜೀವಂತ
ಕುರುಪಾಂಡವರ ಸೇಡಿನ ಕದನವು
ಕತೆಯಲಿ ಒಂದು ನೆಪ ಮಾತ್ರ
ಒಳಗಡೆ ನಡೆವುದು ಗುಣಾವಗುಣಗಳ
ಅದ್ಬುತವೆನಿಸುವ ರಸಚಿತ್ರ
ಕರ‍್ಣ ಅರ‍್ಜುನ ಬೀಮ ದುರ‍್ಯೋದನ
ಶಕುನಿಗಳೆಲ್ಲರು ನಮ್ಮೊಳಗೆ
ಬೀಶ್ಮ ದ್ರೋಣ ವಿದುರ ಕ್ರುಪರು
ಅವತರಿಸುವರು ಮನದೊಳಗೆ
ಏಕಲವ್ಯ ಅಬಿಮನ್ಯು ಬಾಲರು
ಶಸ್ತ್ರ ವಿದ್ಯೆಯ ಬಲ್ಲವರು
ಅಂಬೆ ಕುಂತಿ ಗಾಂದಾರಿ ದ್ರೌಪತಿ
ಎಲ್ಲರ ಮನವನು ಗೆಲ್ಲುವರು
ವಸುದೇವ ಕ್ರಿಶ್ಣ ಬಲದೇವ ಕಂಸ
ಕುರು ಪಾಂಡವರ ನೆಂಟರು
ಬಕ ಹಿಡಿಂಬ ಗಟೋತ್ಕಚರು
ದೈತ್ಯ ಶಕ್ತಿಯ ಬಂಟರು
ವೀರ ಸಾಹಸ ಸಹನೆ ಮತ್ಸರ
ಬೆರೆತುಕೊಂಡಿವೆ ಕತೆಯಲ್ಲಿ
ವಿನಯ ಗರ‍್ವ ಪ್ರತಿಶ್ಟೆ ಪಣಗಳು
ಮೆರೆದಿವೆ ಉಜ್ವಲ ಪಾತ್ರದಲಿ
ಆಲದ ಕಾಂಡ ಬೇರು ಬಿಳಲು
ಬೆಸೆದುಕೊಂಡಿವೆ ಬಂದುರ
ಸಾವನು ಮೀರಿದ ಎಶ್ಟೋ ಕತೆಗಳು
ತುಳುಕಿಸಿ ಬಿಟ್ಟಿವೆ ಹಂದರ
ಪಂಪ ರನ್ನ ಕುಮಾರವ್ಯಾಸರ
ಸೆಳೆದುಬಿಟ್ಟಿದೆ ಈ ಕತನ
ಕನ್ನಡ ಮಣ್ಣಿನ ಸತ್ವವ ಪಡೆದು
ಮೂಡಿಸುತಲಿರುವುದು ಸಂಚಲನ
ನಾಟಕ ಕಾವ್ಯ ಮಹಾಕಾವ್ಯದ
ಟಿಸಿಲೊ ಟಿಸಿಲು ನೂರಾರು
ಕಾದಂಬರಿ ಕತೆ ಪುನರವತಾರದ
ಪರ‍್ವವೆ ನಡೆದಿದೆ ಬಲುಜೋರು
ಆಟ ಬಯಲಾಟ ಯಕ್ಶಗಾನದಿ
ಚಿಮ್ಮಿಸಿ ಬಿಡುವುದು ಸಂಬ್ರಮ
ಪುರಾಣ ಪ್ರವಚನ ಕೀರ‍್ತನಗಳಲಿ
ನುಡಿಸುತಲಿರುವುದು ಸರಿಗಮ
ಅಂದಿನ ಕತೆಯು ಇಂದಿಗೂ ಹೊಂದುತ
ತೋರುವುದೆಮ್ಮಯ ಬಿಂಬವನು
ಕೇಳುತ ಓದುತ ಒಳಗೆ ಬೆಳೆದು
ಒಡೆವುದು ಬಾಳಿನ ಗುಂಬವನು
ನ್ಯಾಯ ಅನ್ಯಾಯ ದರ‍್ಮ ಅದರ‍್ಮಕೆ
ಗೆರೆಯನೆಳೆವುದು ಕಡು ಕಶ್ಟ
ಜಿದ್ದಾ ಜಿದ್ದಿನ ಪಣದಲಿ ಸಿಕ್ಕು
ಬಳಲುವ ಚಿತ್ರವು ಬಲು ಸ್ಪಶ್ಟ
ಗೆದ್ದವರಾರು ಸೋತವರಾರು
ಎಲ್ಲರ ಮನದಲಿ ತಾಕಲಾಟ
ಸೋಲು ಗೆಲುವನು ಮೀರಿದ ಬದುಕಿಗೆ
ನಡೆದಿದೆ ಏನೊ ಹುಡುಕಾಟ
(ಚಿತ್ರ ಸೆಲೆ: ttvaibhavam.com )
ಇತ್ತೀಚಿನ ಅನಿಸಿಕೆಗಳು