ಕವಿತೆ: ಯಾಕೋ ಮನಸು ಬಾರ
– ವಿನು ರವಿ.
ಏನೋ ಬೇಸರ
ಯಾಕೋ ಮನಸು ಬಾರ
ಕಾರ‍್ಮೋಡದ ಕಪ್ಪೆಲ್ಲಾ
ಕಣ್ಣೊಳಗೆ ಇಳಿದಂತೆ
ಮಳೆ ಹನಿಯ ತಂಪೆಲ್ಲಾ
ಎದೆಯೊಳಗೆ ತಣ್ಣಗೆ ಕೊರೆದಂತೆ
ಏನೋ ಬೇಸರ
ಯಾಕೋ ಮನಸು ಬಾರ
ಗಾಳಿಯ ಮೊರೆತವೆಲ್ಲಾ
ವಿಶಾದ ಗೀತೆ ಹಾಡಿದಂತೆ
ಗಾಡವಾದ ಕತ್ತಲೆಲ್ಲಾ
ಬಣ್ಣವಿಲ್ಲದ ನೆರಳ ಚಿತ್ರದಂತೆ
ಏನೋ ಬೇಸರ
ಯಾಕೋ ಮನಸು ಬಾರ
ಬರೆದ ಪದಗಳೆಲ್ಲಾ
ನೆನಪಿನ ಸುಳಿಯಲ್ಲಿ ಸಿಲುಕಿದಂತೆ
ತೋರಿದ ಪ್ರೀತಿಯೆಲ್ಲಾ
ಮಬ್ಬೊಳಗೆ ಮುಸುಕಿದಂತೆ
ಏನೋ ಬೇಸರ
ಯಾಕೋ ಮನಸು ಬಾರ
(ಚಿತ್ರ ಸೆಲೆ: pixabay.com)
ಇತ್ತೀಚಿನ ಅನಿಸಿಕೆಗಳು