ಮೇಕೆದಾಟು – ಇಂದಿಗೂ ನಾಳೆಗೂ ಎಂದೆಂದಿಗೂ

– ನವೀನ ಪುಟ್ಟಪ್ಪನವರ.

ಮುಂಜಾವಿನ ಮೋಡ ಕತ್ತಲಿನ ಕಿಟಕಿ ತೆರೆಯುತಿರಲು
ಅರೆಬರೆ ಕನಸುಗಳ ಚಿತ್ರಣ ಕಾಣುತಿರಲು
ಕಲಿಯುಗದ ಮೊಬೈಲ್ ಅಲಾರಾಮ್ ಕಿರಿಕಿರಿ
ಗಂಟೆ ಆರಾಗುತಿರಲು
ನಿಸರ‍್ಗದ ಮಡಿಲಲ್ಲಿ ತೇಲಲು ತರಾತುರಿ
ಮೊಗ್ಗಿನ ಕುತೂಹಲದ
ಕವಲುದಾರಿಗೆ ಅರಳಿದ ಮೈಸಿರಿ

ಹಸಿವಿನ ತಾಳಕ್ಕೆ ಮೇಳವಾದ
ತವರುಮನೆ ತಟ್ಟೆ ಇಡ್ಲಿ
ಹ್ರುದಯದ ಮೌನವನ್ನು
ಆಲಿಸಿದ ಪಿರಮಿಡ್ ವ್ಯಾಲಿ
ಕೆಸರಿನಲ್ಲಿ ಅರಳಿದ ಕಮಲ
ನೆನಪಿನ ಮುತ್ತುಗಳ ಹವಳ

ಚುಂಚಿ ಪಾಲ್ಸ್ ಅರಸಿ ಹೊರಟ ಪಯಣ
ಕೆಂಡದ ಬಿಸಿಲಿಗೆ ಮಂಕಾದ ನಯನ
ಜುಳು-ಜುಳು ಹರಿಯುವ ನೀರು ಕೇಳಿದ ಕ್ಶಣ
ಮನದ ಬುಗ್ಗೆಗೆ ಎಲ್ಲಿಲ್ಲದ ಉಲ್ಲಾಸ ವಿನೂತನ
ಹರಿದು ಕೊರೆದು, ಪ್ರಕ್ರುತಿಗೆ ಸವೆದ
ಬಂಡೆಗಳ ಐಸಿರಿ ತಲ್ಲಣ

ಸೂರ‍್ಯನ ಪ್ರಕಾಶ ಕಿರಣಗಳನ್ನು
ತಂಪಾಗಿಸಿದ ಕಾವೇರಿಯ ಪ್ರಕ್ರುತಿ ಸೆರಗು
ಕಣ್ಣಂಚಲಿ ಆನಂದದ ಹೊಳೆ ಹರಿಸಿದ
ಕಾವೇರಿ-ಅರ‍್ಕಾವತಿ ಸಂಗಮದ ಮೆರಗು
ಕಡಿದಾದ ಶಿಲೆಗಳಲ್ಲಿ ದಾಟಿದ ಶಿವನ
ಮೇಕೆಯ ಹೆಜ್ಜೆಗುರುತ ಚಿತ್ರಣ
ಇಂದಿಗೂ ನಾಳೆಗೂ ಎಂದೆಂದಿಗೂ

(ಚಿತ್ರಸೆಲೆ: ನವೀನ ಪುಟ್ಟಪ್ಪನವರ)