ಏನಾಗಿದೆ ನನಗೇನಾಗಿದೆ…

– ಸಿಂದು ಬಾರ‍್ಗವ್.

ಏನಾಗಿದೆ ನನಗೇನಾಗಿದೆ
ಮನಸೀಗ ಏಕೋ ಮರೆಯಾಗಿದೆ
ಹಸಿರಾಗಿದೆ ಉಸಿರಾಗಿದೆ
ನಿನ್ನ ಹೆಸರೀಗ ನನ್ನ ಉಸಿರಾಗಿದೆ

ಕರಗಿದೆ ಮನ ಕರಗಿದೆ
ಇಬ್ಬನಿಯಂತೆ ಈ ಮನ ಕರಗಿದೆ
ಮುಳ್ಳಿನ ನಡುವಲಿ ಆ ಸುಮದಂತೆ
ಅರಳಿದ ಹೂಮನವ ನಾ ನೋಡಿದೆ

ಹಾರಾಡಿದೆ ಮನ ಹಾರಾಡಿದೆ
ಕನಸುಗಳೆಲ್ಲ ಕೈಸೇರಿದೆ
ಮೋಡದ ಮರೆಯ ಕಿರಣಗಳಂತೆ
ಮನದ ಆಳಕೆ ನೀ ಇಳಿದೆ

ಹಾಡಿದೆ ಕೋಗಿಲೆ ಹಾಡಿದೆ
ಜೋಡಿಯ ನೋಡಿ ಈಗ ಹೊಗಳಿದೆ
ಕೆರೆಯ ಕಮಲಕೆ ನಾಚಿಕೆಯು ಹೆಚ್ಚಿ
ನಗುತ ಕೆನ್ನೆಯು ಕೆಂಪಾಗಿದೆ

ಕುಣಿದಿದೆ ಮನ ಕುಣಿದಿದೆ
ನವಿಲಿನ ಜೊತೆಗೆ ನಲಿದಿದೆ
ಮಂದಾರಹೂವು ಮಂಟಪದಲ್ಲಿ
ಮದುವೆ ಸಂಬ್ರಮವು ಹೆಚ್ಚಾಗಿದೆ

(ಚಿತ್ರಸೆಲೆ: make2fun.blogspot.in )