ಮರಿ ಹಕ್ಕಿ

– ಮಾನಸ ಎ.ಪಿ.

ಮರಿ ಹಕ್ಕಿಯೊಂದು
ರೆಕ್ಕೆ ಬಿಚ್ಚಿ ಹಾರಲು ಕಲಿಯಿತು
ಗೂಡ ಬಿಟ್ಟು ಅತ್ತ ಇತ್ತ
ಕತ್ತು ಕೊಂಕಿಸಿ ನಕ್ಕು ನಲಿಯಿತು

ಅಮ್ಮ ಹಕ್ಕಿ ತುತ್ತನರಸಿ
ದೂರತೀರ ಸಾಗಿತು
ಗೂಡ ಬಿಟ್ಟು ಹೋಗದಿರೆಂದು
ಕಿವಿಮಾತು ಹೇಳಿತು

ಪಕ್ಕದಲ್ಲಿ ಬಿದ್ದ ಕಾಳು ಕಂಡು
ಮರಿ ಹಕ್ಕಿ ಆಸೆ ಪಟ್ಟಿತು
ಅಮ್ಮನ ಮಾತು ಮರೆತು
ಕಾಳು ಹೆಕ್ಕಲೆಂದು ಬೀದಿಗಿಳಿಯಿತು

ಅಮ್ಮನಿಗಿಂತ ಮೊದಲೇ
ಕಾಳು ಸಿಕ್ಕಿತು ಎಂದು
ಮನದಿ ಬೀಗಿತು

ಯಾವ ಪರಿವೆ ಇರದೆ
ಕಾಳು ಹೆಕ್ಕುತ ನಡೆವ
ಪುಟ್ಟ ಮರಿಯ ಅಂದ ಕಂಡು
ದಾರಿ ಹೋಕರೆಲ್ಲ ಸುತ್ತ ನೆರೆದರು
ಹಕ್ಕಿ ಹಿಡಿವ ಆತುರದಲಿ
ಮುದ್ದು ಹಕ್ಕಿಗೆ ಗಾಸಿಮಾಡಿದರು

ಅತ್ತ ಇತ್ತ ನೋಡಿ ಹಕ್ಕಿ
ರೆಕ್ಕೆ ಬಲಿತ ಸೊಕ್ಕಿನಿಂದ
ಗೂಡು ಬಿಟ್ಟು ಬಂದುದಕೆ
ಮನೆಯ ದಾರಿ ಮರೆಯಿತು

ಅಮ್ಮನಿರದೆ ಜೊತೆಯಲಿ
ಕಂಗಾಲಾಗಿ ಮನದಲಿ
ತಕ್ಕಶಾಸ್ತಿ ಆಯಿತೆಂದು
ಬಿಕ್ಕಿ ಬಿಕ್ಕಿ ರೋದಿಸಿತು

( ಚಿತ್ರ ಸೆಲೆ: dragoart.com )